Testar ut papirlause dopingkontrollar
ADNO er ein av dei fyrste antidopingbyråa som får teste ut bruk av nettbrett ved dopingkontrollar. – Vil bli ein stor forbetring for både oss og utøvarane, seier fagrådgjevar Geir Holden.
Verdas antidopingbyrå (WADA) er i ferd med å fullføre utvikling av papirlause dopingkontrollar. Saman med antidopingbyråa i Storbritannia (UKAD) og Australia (ASADA) er Antidoping Norge dei fyrste til å teste den nye løysinga ut.
Fordel også for utøvarar
I dag blir skjemaet utøvarane fyller ut saman med dopingkontrolløren gjort skriftleg. I etterkant blir det manuelt lagt inn i datasystemet ADAMS. Med det nye systemet på plass vil ein fylle ut desse opplysningane digitalt rett inn i systemet på sjølve dopingkontrollen.
– Dette er eit viktig steg framover for kunne bruke teknologi som er tilgjengeleg for å effektivisere og heve kvaliteten på dopingkontrollprosessen, seier fagrådgjevar, Geir Holden.
Utøvarane vil også kunne merke det nye digitale systemet.
– Fordelen for meldepliktutøvarane er at det kjem til å ta kortare tid før dei kan gå inn og sjekke eigne prøvesvar i ADAMS. Dei vil også motta ein kryptert e-post med kopi av dopingkontrollskjemaet i etterkant, fortel Holden.
Usikkert når det blir tatt i bruk for fullt
Antidoping Norge har nå kjøpt inn nettbrett og har begynt å teste det nye verktøyet internt. Tilbakemeldingane ein etter kvart får frå utprøvinga og sender vidare til WADA blir viktige.
– Me ser fram til å teste ut betaversjonen av denne appen og gje tilbakemeldingar til WADA på kva som fungerer bra og kva ein bør utvikle vidare, seier Holden.